همسات حائرة
عضو ذهبي
أيام قليلة وتنتهي الدراسة ويحمل كل طفل صغير أقلامه ومسطرته والبرشام لزوم التعاون مع الأشقاء في الامتحان
ثم يقبل والدته الحنونة اللي صاحية من الفجر عشان تكوي له المريلة وتعمل له الساندوشتات يمكن يطمر فيه ويطلع حاجةعليها القيمة
ويرد الطفل بابتسامة حانية : فين المصروف يا حاجّة :: عشان أجيب سوجارتين عشان أظبط الدماغ لاستقبال العلم عشان أكتبه في الامتحان :: رغم أن وصلة الدش مابتوصلش للمدرسة بس هنحاول:: ولا يأس مع الحياة:: ولا حياة لمن تنادي.
قديما قالوا لنا أن التعليم كالهواء والماء
وطبعا الهواء ملوث:: والماء الحمد لله مش موجود::: ولو موجود هتلاقي فيه تيفود
فكلنا يعرف أن القراءة للجميع ولكن التعليم للأغنياء فقط
فالمدارس الحكومية زي الحكومة بالظبط تؤمن بأن العلم نورون وطبعا الكهرباء قطعت عشان تخفيف الأحمال
عشان كده وزارة التعليم بدأت بتخفيف العقول
عشان كده بنطالب بتكييف وإزازتين ميه معدنية لكل طالب عشان نضمن بيئة صحية للطفل عشان يتعلم.
للأسف الشديد وزارة التعليم هي صاحبة أفضل اختراعات وابتكارات القرن العشرين بعد النوبايل الصيني
فلا أعرف لماذا ينزل الإلهام على كرسي وزير التعليم بالذات فيقوم بتطبيق نظام جديد للتعليم بحيث تسول له نفسه أن هذا التطوير في التعليم المصري سيصبح أفضل الاختراعات في التاريخ بعد إبرة الخياطة وكوتشي أميجو اللي كان بينور قبل الكهرباء ما تقطع
ويعلم الجميع على مستوى العالم أنه لا سبيل لنهوض أي دولة إلا بالتعليم فاليابان مثلا بعد كارثة ناجازاكي وهيروشيما بثلاثة أيام فقط بدأت في استكمال العام الدراسي لبناء الجيل الجديد الذي سيقيل عثرة تلك البلد المدمر.
لكل مسؤول عن البلد
لماذا تكون دائما ميزانية التعليم هي الأقل دائما ويكتفي الوزير كل سنة بتصريحات تفيد أن عدد الناجحين في الثانوية العامة أفضل من العام السابق
لماذا دائما ما كنا نرى أناس لا علاقة لهم بالتعليم يتولون منصب وزير التعليم
فــ مرة نجد طبيب أطفال:: ومرة نجد أستاذ بكلية الحقوق
بالله عليكم جدتي الله يرحمها كانت بتقول
يا ابني إدي العيش لخبازه:::
بس العيش أبو شلن الله يرحم أيامه ويبشبش الطوبة اللي تحت مسماره.
دماغنا صدعت بوعود التنمية والديموقراطية والرفاهية
والحال زي ما هو
لأني كل ما أسمع تصريح عن التطور والحضارة المصرية أفرح ويشرأب قلبي إن خلاص البِلْية هتلعب مع مصر وهنبقى من الدول اللي واقفة في أول طابور التنمية
لكن سرعان ما أجد حال التعليم عندنا يتدهور من سيء لأسوأ
أرجع وأقول كلمة سعد زغلول "مفيش فايدة"
وفعلا زي ما قال عادل إمام : العلم لا يكيل بالبتنجان
فالبتنجان في السوق :: والسوق مقفول عشان الانتخابات والانفلات الأمني
كلامي صح والا لأ؟؟
عالعموم الاختلاف في الآراء لا يفسد للبتنجان صينية
كويس النور جه
ولع البوتاجاز عشان البتنجان ما يحمضش
ويجعله عامر
