عباس حلمى التانى
عباس حلمى التانى ، الخديوى ( اسكندريه، 14 يوليه 1874 - جنيف ، سويسرا ، 19 ديسمبر 1944 ). ابن الخديوى توفيق ابن الخديوى اسماعيل ابن ابراهيم باشا ابن محمد على باشا. اتنصب خديوى على مصر فى 8 يناير 1892 يوم قبل وفاة ابوه اللى عييى و مات بعد سبع تيام ، و حكم لغاية ما عزله الانجليز فى 10 سبتمبر 1914.
فى عهده حصلت حادثة دنشواى و كان أخر حكام مصر اللى اتلقبو بلقب خديوى.
يوم ما اتقرر تنصيبه كان فى النمسا و استدعوه لمصر فرجع اسكندريه بسرعه و من هناك اخد القطر طوالى على القاهره. و لإنه كان لسه صغير و ما بلغش سن الرشد ( 18 سنه ) بالنسبه للسنه الميلاديه حصلت ازمه و اتفق رجال الدين مع السياسيين على تطبيق السنه الهجريه و اعلنو انه كمل 18 سنه هجريه يوم 14 يوليه 1901.
بدأ عباس حلمى التانى فترة حكمه كحاكم وطنى بيناهض الاحتلال الانجليزى و قرر انه ما يبقاش زى ابوه فى تعامله مع الانجليز ، و بعد سنه من توليه الحكم اقال وزارة مصطفى فهمى باشا اللى كانت بتوالى الانجليز فحصلت ازمه بينه و بينهم و اتحدى اللورد كرومر المندوب السامى البريطانى فى مصر فزادت شعبيته و حبته الناس.
فى 7 يناير 1908 اصدر عباس حلمى قرار بالعفو عن 9 اشخاص كان محكوم عليهم بالاشغال الشاقه المؤبده فى قضية دنشواى اللى حصلت فى عهده و اغتيل بطرس باشا غالى اللى إترأس محكمة دنشواى بصفته الوظيفيه كوزير للحقانيه وقتها و أيد الخديوى على مد امتياز شركة قناة السويس اربعين سنه اضافيه من 1968 ل 2008. و علا نجم الزعيم مصطفى كامل و الشيخ سلامه حجازى لكن عباس حلمى كان بيكره الامام محمد عبده و كان بيسميه " عدو الله و عدو النبى " و ما زعلش لوفاته و وبخ شفيق باشا لإنه مشى فى جنازته.
حاول عباس حلمى التانى من غير جدوى انه يقاوم الاحتلال البريطانى اللى خضعت ليه مصر فى عهد ابوه سنة 1882. استعان فى محاربته للاحتلال البريطانى بالقوى الداخليه فى مصر و خصوصاً الظباط و المثقفين المصريين و مصطفى كامل لكن بعد شويه انقلب على مصطفى كامل و على محمد فريد بعده و بدأ يظهر موالاه للانجليز و احتفل بعيد ميلاد ملكهم.
خلعه الانجليز فى 10 سبتمبر 1914 و هو فى استانبول و اتعرض هناك لمحاولة اغتيال على ايد شاب مصرى اسمه محمود مظهر لكن نجا فبعته السلطان التركى جنيف فى سويسرا عشان يتعالج ، و لما قامت الحرب العالميه الاولى و هو بره مصر انتهز الانجليز الفرصه و خلعوه من الحكم و طلبو منه انه ما يرجعش مصر و نصبو عمه حسين كامل سلطان على مصر بداله و فرضو الحمايه على مصر رسمى فى ديسمبر 1914.
عاش عباس حلمى التانى منفى فى جنيف لمدة تلاتين سنه لغاية ما اتوفى فى 19 ديسمبر 1944.
عباس حلمى كان اخر خديوى لمصر و السودان ، و بعدين اتغير لقب خديوى مصر للقب سلطان ، و اول واحد اتلقب بيه كان عمه السلطان حسين كامل ابن الخديوى اسماعيل اللى خلفه.
